த.தே.கூட்டமைப்பில் உள்ள பங்காளி கட்சிகளுக்கிடையில் கலந்துரையாடல்

தமிழ் தேசியக் கூட்டமைப்பின் பங்காளிக் கட்சிகளுக்கு இடையிலான கூட்டம் நேற்று மாலை ஆறு மணிக்கு கொழும்பிலுள்ள கூட்டமைப்பின் தலைமைக் காரியாலயத்தில் தமிழ் தேசியக் கூட்டமைப்பின் தலைவர் இரா.சம்பந்தன் தலைமையில் இடம்பெற்றதாக தமிழ் தேசியக் கூட்டமைப்பின் நாடாளுமன்ற உறுப்பினர் எம்.ஏ. சுமந்திரன் இணையத்தளத்திற்கு தெரிவித்தார்.
இது குறித்து தொடர்ந்து கருத்து தெரிவித்த அவர், தமிழ் தேசியக் கூட்டமைப்பு எவ்வாறான கட்டுக்கோப்புடன் எதிர்காலத்தில் செயற்பட வேண்டும் என்பது தொடர்பிலும் கூட்டமைப்பு முன்னெடுக்க வேண்டிய நடவடிக்கைகள் குறித்து எவ்வாறு ஆராயலாம் என்பது குறித்தும் கலந்தாலோசிக்கப்பட்டது. மேலும் உயர்மட்டக் குழு, நிதிக் குழு மற்றும் ஏனையக் குழுக்களை அமைப்பது பற்றி யோசனைகள் முன்வைக்கப்பட்டன. இதேவேளை எதிர்காலத்தில் முன்னெடுக்கப்பட வேண்டிய நடவடிக்கைகள் பற்றி தொடர்ச்சியாக இவ்வாறு ஆராய்வோம் என இக்கூட்டத்தில் தீர்மானிக்கப்பட்டதாக கூறினார். இக் கலந்துரையாடலில் தமிழரசுக் கட்சி, தமிழர் விடுதலைக் கூட்டணி, ரெலோ, ஈ.பி.ஆர்.எல்.எப். மற்றும் புளொட் ஆகிய கட்சிகளின் முக்கியஸ்தர்கள் கலந்துகொண்டனர். -->