இது தொடர்பாக கருணாநிதி வெளியிட்டுள்ள அறிக்கையில் மேலும் கூறியுள்ளதாவது, 'இலங்கை இராணுவ அதிகாரிகளுக்கு இந்தியாவில் பயிற்சி கொடுப்பது பற்றி தமிழகத்தின் சார்பில் முறையிடும் போதெல்லாம் அந்த இராணுவ வீரர்களைத் திருப்பி அனுப்புவதும், சில நாட்களுக்குப் பிறகு மீண்டும் பயிற்சி கொடுப்பதும் தொடர் கதையாக நீடிக்கிறது. இந்தப் போக்கினை இந்திய மத்திய அரசு இனியும் நீடிக்காமல், உடனடியாக இலங்கை அரசுடன் இந்தப் பயிற்சி குறித்தும், இந்திய மீனவர்கள் தாக்கப்படுவது குறித்தும் கடுமையாகப் பேசி தக்க நடவடிக்கை எடுக்க வேண்டும். இதற்கு முன்பு ஓரிரு முறை இலங்கை இராணுவத்திற்கு தமிழகத்திலே பயிற்சி அளித்தபோது அதுபற்றி கழக ஆட்சியிலும், அ.தி.மு.க. ஆட்சியிலும் மத்திய அரசிடம் முறையிட்டதும், உடனடியாக அப்படி பயிற்சிக்கு வந்தவர்கள் தமிழகத்திலிருந்து திரும்ப அனுப்பப்பட்டார்கள். ஆனால் இப்போது அதற்கு மாறாக மத்திய அரசின் சார்பில், இராணுவ இணை அமைச்சர் பல்லம் ராஜு நேற்றைய தினம் கூறும் போது, இலங்கை, நமது நட்பு நாடு, எனவே இலங்கை இராணுவத்திற்கு தொடர்ந்து பயிற்சி அளிப்போம் என்று கூறியிருக்கிறார். இந்தப் பதில் தமிழ் நாட்டையும், தமிழர்களின் உணர்வுகளையும் மத்திய அரசு காயப்படுத்தும் கருத்தாகும். 2009ஆம் ஆண்டு இலங்கையில் நடைபெற்ற போருக்குப்பின், இலங்கை அரசு இந்தியாவை நட்பு நாடாகக் கருதுவதைவிட, சீனாவையும், பாகிஸ்தானையும் தான் நட்பு நாடுகளாகக் கருதிச் செயல்படுகிறது. தமிழர்களின் வடக்கு மாகாணத்தில் பலாலி, காரைநகர், மன்னார், ஆனையிறவு, தல்லாடி, முல்லைத் தீவு, கிளிநொச்சி, வவுனியா போன்ற இடங்களில் இலங்கை அரசின் இராணுவம், விமானப்படை மற்றும் கப்பற்படை தளங்களை அமைத்துள்ளது. அந்த முகாம்கள் அங்கே அமைக்கவும், இராணுவ வீரர்கள் மற்றும் அதிகாரிகள் குடும்பங்கள் அங்கே தங்குவதற்குமான ஏற்பாடுகளையெல்லாம் சீனாதான் செய்து கொடுக்கிறது. இதைப்பற்றி விவாதிக்க சீன இராணுவ அமைச்சர் லியாங் குவாங்ஜி என்பவர் 29ஆம் திகதி இலங்கைக்கு வருகிறார். அப்போது அங்கே உயர்மட்ட இராணுவப் பிரதிநிதிகளின் கூட்டமும் நடைபெறவுள்ளது. மேலும் எதிர்வரும் செப்டம்பர் 15ஆம் திகதியன்று சீன மக்கள் காங்கிரஸின் துணைத் தலைவர் யு பாங்கோ தலைமையிலான பிரதிநிதிகள் குழு ஒன்றும் இலங்கைக்கு வருகிறது. அந்தக் குழுவிலே 96 சீன பிரதிநிதிகள் இருப்பார்களாம். இந்தக் குழு இலங்கையில் தமிழர்கள் அதிகம் வசிக்கும் வடக்கு மற்றும் கிழக்கு பகுதிகளில் சுற்றுப்பயணம் செய்து நேரில் பார்வையிட இருக்கிறார்களாம். இது மாத்திரமல்ல, இலங்கைக்கு சீனா 36 ஆயிரம் கோடி ரூபாய்ச் செலவில் 14 திட்டங்களை நிறைவேற்றி தந்திருக்கிறது. இலங்கை இராணுவம் மற்றும் பொலிஸ் துறையில் பணிபுரிபவர்களின் குழந்தைகளை படிக்கவைக்க ஒன்பது கோடி ரூபாய் செலவில் பள்ளிக்கூடம் ஒன்றை சீனா கட்டிக் கொடுத்திருக்கிறதாம். சீனாவிடமிருந்து 59 கோடி ரூபாய் செலவில் எம்.ஏ. 60 ரக பயணிகள் விமானம் வாங்கிட இலங்கை ஒப்பந்தம் செய்துள்ளது. இந்தியாவைவிட ஆறு மடங்கு அதிகமான பல்வேறு உதவிகளை சீன நாடு, இலங்கைக்கு செய்து கொடுத்திருக்கின்ற நிலையில் இந்தியா எதை நம்பி இன்னமும் இலங்கை நட்பு நாடு என்று சொல்லிக் கொண்டிருக்கிறதோ? இதை ஒரு தலை நட்பு என்றுதான் சொல்ல முடியுமே தவிர, இரு நாடுகளுக்கு இடையேயான சுமூகமான நட்பு என்று எப்படிச் சொல்ல முடியும்? இந்தியப் பிரதமர் உடனடியாக இந்தப் பிரச்சினையிலே தலையிட்டு, இராணுவ இணை அமைச்சர் பல்லம் ராஜு தெரிவித்துள்ள கருத்தினை மறு பரிசீலனை செய்வதோடு, நீலகிரி மாவட்டத்தில் பயிற்சி பெறும் இரண்டு இலங்கை இராணுவ அதிகாரிகளை மீண்டும் இலங்கைக்கே திருப்பி அனுபப நடவடிக்கை எடுக்க வேண்டும். அத்துடன், மீண்டும் இவ்வாறான இராணுவ பயிற்சிகள் இலங்கை இராணுவத்தினருக்கு இந்தியாவிலே அளிப்பதை உறுதியாகத் தவிர்த்திட வேண்டுமென்றும் வலியுறுத்திக் கேட்டுக் கொள்கிறேன்' என்று கருணாநிதி தெரிவித்துள்ளார்.
0 கருத்துகள்:
கருத்துரையிடுக
‘பின்னூட்டமிட்டு செல்லுங்கள்’