வேலணை மத்திய மருந்தகத்தில் குடும்பநல உத்தியோகத்தராகப் பணியாற்றி வந்துள்ள நிலையில் கடந்த 10ம் திகதி மரணமெய்தியுள்ள கைதடி தெற்கைச் சேர்ந்த தர்சிகா சரவணை எனும் இளம் பெண்ணின் மரணம் தொடர்பில் பல்வேறு சந்தேகங்கள் நிலவுவதாக ஈழ மக்கள் ஜனநாயகக் கட்சியின் செயலாளர் நாயகமும் அமைச்சருமான டக்ளஸ் தேவானந்தா அவர்களுடன் தொடர்புகொண்டு பல்வேறு தரப்பினரும் முறைப்பாடுகளை முன்வைத்துள்ளனர்.
இந்த நிலையில் இம்மரணம் தொடர்பிலான விசாரணைகள் தற்போது ஊர்காவற்றுறை நீதிமன்றத்தில் இடம்பெற்றுவரும் நிலையில் இந்த மரண விசாரணைகள் துரிதப்படுத்தப்பட்டு இம்மரணம் தொடர்பில் மக்கள் மத்தியில் நிலவுகின்ற சந்தேகங்கள் தீர்க்கப்படவேண்டும் என்பது எமது நிலைப்பாடாகும்.
குறித்த இப்பெண்ணின் மரணம் தொடர்பில் சந்தேகஙகள் நிலவுவதாக பொதுமக்கள் மத்தியில் பல்வேறு கருத்துக்கள் நிலவி வருவதால் தீவகப்பகுதி உட்பட யாழ். குடாநாட்டில் ஒருவித பதற்ற நிலை உருவாகியுள்ள நிலையில் நீதிமன்ற விசாரணைகள் துரிதப்படுத்தப்பட்டு உண்மை நிலை பொதுமக்களுக்குத் தெரியவரவேண்டியது அத்தியாவசியமாக உள்ளதை இங்கு நாம் சுட்டிக்காட்ட விரும்புகின்றோம்.
அதேநேரம் இம்மரணம் தொடர்பான நீதிமன்ற தீர்ப்பு வெளிவரும் முன்பே இம்மரணம் குறித்து பல்வேறு ஊகங்களை வதந்திகளாகப் பரப்பி சுயலாப அரசியல் நடாத்தும் சக்திகள் குறித்தும் எமது மக்கள் விழிப்புடன் இருக்க வேண்டும் என்றும் கேட்டுக் கொள்வதுடன் மறைந்த செல்வி தர்சிகாவின் பிரிவால் துயருறும் அன்னாரது குடும்ப உறவினர்கள் நண்பர்கள் மற்றும் ஏனையோருடன் நாமும் எமது துயரங்களைப் பகிர்ந்து கொள்ளுகின்றோம்.
0 கருத்துகள்:
கருத்துரையிடுக
‘பின்னூட்டமிட்டு செல்லுங்கள்’