புத்தளத்தில் அங்கவீனமுற்ற சிறுமியைப் படுகொலை செய்த தந்தை கைது!

புத்தளம் ஆனைமடுவ உஸ்வௌ பகுதியில் ஏழு வயதான அங்கவீனமுற்ற சிறுமியொருவர் கொலை செய்யப்பட்ட சம்பவம் தொடர்பிலான விரிவான விசாரணைகளை ஆனைமடுவ பொலீசார் ஆரம்பித்துள்ளனர். குறித்த சிறுமி அவருடைய தந்தையாரால் கொலை செய்யப்பட்டுள்ளதாக தகவல்கள் கிடைத்துள்ளதென பொலீஸ் ஊடகப்பேச்சாளர் பொலீஸ் அத்தியட்சகர் பிரசாந்த ஜயக்கொடி தெரிவித்துள்ளார். சிறுமியைக் கொலைசெய்து வீட்டு வளாகத்தில் புதைத்து மீண்டும் தோண்டியெடுத்து சடலத்தை எரியூட்டியுள்ளதாக பொலீசாருக்கு தகவல் கிடைத்துள்ளது. கடந்த மூன்றாம் திகதி இந்தக் கொலைச்சம்பவம் இடம்பெற்றுள்ளதாக பொலீசார் மேலும் தெரிவித்துள்ளனர். சம்பவம் தொடர்பில் சிறுமியின் தந்தை கைதுசெய்யப்பட்டு நீதிமன்றில் ஆஜர் செய்யப்பட்ட போது அவரை எதிர்வரும் மார்ச் மாதம் நாலாம் திகதிவரை விளக்கமறியலில் வைக்குமாறு நீதிமன்றம் உத்தரவிட்டுள்ளது.