நாங்கள் எமது செல்வாக்கை மக்கள் மத்தியில் வளர்த்துக்கொள்ள வேண்டுமென்பதற்காகவோ புலம்பெயர் சமூகத்திடமிருந்து நற்சான்றுப் பத்திரம் பெறுவதற்காகவோ அரசியல் நடத்தவில்லை. நாங்கள் நிதானமாக, யதார்த்தமாக அரசிய லில் ஈடுபடுகின்றோம். எமது முக்கியமான நோக்கம் தமிழ் பேசும் மக்களின் பிரச்சினைக்கு உடனடித்தீர்வு காணப்பட வேண்டுமென்பதேயா கும். அதற்காகவே நாம் போராடி வருகின்றோம். புலிகளை தாமே அழித்தோமென பலர் தம்பட்டம் அடித்து வருகிறார்கள். ஆனால் உண்மைநிலை அதுவல்ல. விடுதலைப்புலிகள் தங்களைத் தாங்களே அழித்துக்கொண்டார்கள் என்றே நான் கருதுகிறேன்"
இவ்வாறு தமிழ்த் தேசியக்கூட்டமைப்பின் தலைவரும் திருகோணமலை மாவட்ட நாடாளுமன்ற உறுப்பினருமாகிய இரா.சம்பந்தன் கூறினார்.
தமிழ் பேசும் மக்களின் இன்றைய அரசியல் நெருக்கடி குறித்து ஞாயிறு வீரகேசரிக்கு அவர் அளித்த விசேட பேட்டியிலேயே மேற்கண்டவாறு கூறினார்.
அவர் தொடர்ந்து கருத்துத் தெரிவிக்கையில்,
நான் நாடாளுமன்றத்தில் கடைசியாக ஆற்றிய உரையில் விடுதலைப் புலிகள் வட,கிழக்கில் போராட்டத்தை ஆரம்பித்த போது அதற்கு நியாயம் இருந்தது என்று பேசியிருந்தேன். அதை நியாயப்படுத்தியுமுள்ளேன். ஆனால் காலப்போக்கில் விசேடமாக சர்வதேச சமூகம் விடுதலைப் புலிகளை வேறு விதமாக நோக்கினார்கள். தவறாக கருதினார்கள். அவர்களை சர்வதேச சமூகம் வேறு விதமாக கருதுவதற்கு ஏற்பட்ட காரணங்களையும் நான் தெளிவாக எடுத்துக்கூறினேன். கூற வேண்டிய தேவையும் உள்ளது.
புலிகளை தாமே அழித்தோமென பலர் தம்பட்டம் அடித்து வருகிறார்கள். ஆனால் உண்மை நிலை அதுவல்ல. விடுதலைப்புலிகள் தங்களைத் தாங்களே அழித்துக்கொண்டார்கள் என்றே நான் கருதுகிறேன். சர்வதேச சமூகத்தால் உலக நாடுகளால் விடுதலைப்புலிகள் வேறு விதமாக கருதப்படாமல் இருந்திருந்தால் நியாயத்தின் அடிப்படையில் அவர்கள் போராட்டம் தொடர்ந்திருந்தால் அவர்களுக்கு இவ்விதமான நிலை ஏற்பட வேண்டிய அவசியமில்லையென்றே தான் கூறியிருக்கின்றேன்.
நாங்கள் ஒரு பிரச்சினையைத் தீர்ப்பதற்கு அதன் உண்மையை உணர்ந்து இந்த நாட்டில் வாழக்கூடிய மக்களும் ஆதரிக்கக்கூடிய அந்த மக்களையும் இணைத்து அவர்களின் ஆதரவுகளையும் திரட்டி பிரச்சினைகளுக்கு தீர்வைப் பெற வேண்டும்.
உண்மையின் அடிப்படையிலும் நீதியின் அடிப்படையிலும் நியாயத்தின் அடிப்படையிலும் போராடுவோமானால் எதையும் சாதிக்க முடியும். ஆனபடியால் நான் பேசுவது நியாயத்தை, நீதியை, உண்மையைக் கொண்டு வரக்கூடிய விதத்தில் இருக்க வேண்டுமென்று விரும்புகின்றேன்.
புலம்பெயர் சமூகம் என் மீது குற்றம் சுமத்துவதாக சொல்லப்படுகிறது. எமது மக்களையோ புலம்பெயர்ந்த மக்களையோ தீவிரமாக சிந்திப்பவர்களையோ திருப்திப்படுத்துவதற்காக பேசும் பழக்கம் என்னிடமில்லை.
அரசியல் தீர்வின்றி நாங்கள் எதையும் செய்ய முடியாது இலங்கை அரசாங்கத்தைப் பொறுத்தவரை அரசியல் தீர்வு அத்தியாவசியமான தேவையல்லவெனக் கருதுகிறார்கள். அதற்கு அமைவாகவே தமது நிகழ்ச்சி நிரலை நிறைவேற்றிக் கொண்டு போகின்றார்கள். விசேடமாக வட கிழக்கைப் பொறுத்தவரை இன விகிதாசாரத்தை மாற்றியமைக்கக்கூடிய விதத்தில் தமிழ் பேசும் மக்களின் அடையாளங்களை இல்லாமல் செய்யக்கூடிய வகையிலும் நிரந்தரமான பாதிப்பொன்றை உண்டு பண்ணக்கூடிய விதத்திலும் பல விடயங்களை அரசாங்கம் செய்து கொண்டு போகின்றது. இதன் ஒரு அங்கமாகவே யாழ். குடாநாட்டில் பூர்வீக கிராமங்களின் பெயர்களை மாற்றும் நடவடிக்கைகள் அமைந்து காணப்படலாம்.
ஆனபடியால் தான் அரசியல் தீர்வுப் பிரச்சினைக்கு நிரந்தர தீர்வு காணப்பட வேண்டுமென்பதில் அரசு அக்கறை காட்டவில்லை. எங்களைப் பொறுத்தவரை அரசியல் தீர்வு இல்லாத தற்போதைய நிலை தொடருமாக இருந்தால் எங்களுடைய மக்களுக்கு எதிர்காலத்தில் பெரும் ஆபத்து ஏற்படக்கூடும். இந்நிலை தொடர அனுமதிக்க முடியாது.
சர்வதேச சமூகமும் தன்னால் இயன்ற முயற்சிகளை தீர்வு காண எடுத்து வருகின்றது. இங்கு வாழும் அனைத்து மக்களும் குறிப்பாக பெரும்பான்மை சமூகம் எமக்கொரு தீர்வு வர ஒத்துழைக்க வேண்டும். அதே வேளை எமது நிலைப்பாட்டை வலியுறுத்த சாத்வீகப்போராட்டம் ஒன்றை எற்படுத்துவதன் மூலம் தான் அதை நாங்கள் முழுமையாக வெளிக்கொண்டு வர முடியும் எமது அபிலாஷைகளை வெளிக்காட்ட முடியும்.
இந்த நாட்டில் வாழும் ஏனைய சமூகத்துக்கும் சர்வதேச சமூகத்துக்கும் எமது நிலைமையை தெளிவாக எடுத்துக்காட்ட வேண்டுமானால் சாத்வீகப்போராட்டத்தில் தமிழ் பேசும் மக்கள் ஈடுபட வேண்டிய தேவை தற்போது உருவாகி வருகிறது. அப்போராட்டத்தை நாங்கள் எவ்வித வன்முறையுமின்றி ஒழுக்கமாகஇ அமைதியாக சாத்வீக போரை செய்ய வேண்டிய காலம் நெருங்கி வருகிறது. இது விடயமாக நாம் எல்லோருடனும் கூடிக்கலந்து ஆலோசித்து முடிவு எடுக்க வேண்டும்.
தங்களுடைய தென்னாபிரிக்க விஜயம் சம்பந்தமாக என்ன பலனை எதிர்பார்க்க முடியுமென வினவிய போது
பயணம் மேற்கொள்வதற்கு முன்பு எதையும் எதிர்வு கூற முடியாது. வெற்றியளிக்கும் அல்லது தோல்வி அளிக்கும் அல்லது என்னவிதமாக முடிவடையுமென்று இப்போதைக்கு கூற முடியா விட்டாலும் தென்னாபிரிக்காவில் நீண்ட காலமாக இருந்து வந்த தேசியப்பிரச்சினை அங்குள்ள பெரும்பான்மை சமூகமான கறுத்த இன மக்களை சிறுபான்மை வெள்ளைச்சமூகம் ஆண்டு வந்த நிலைக்கு ஜனநாயக ரீதியாக தீர்வு காணப்பட்டது. ஜனநாயகத்தின் அடிப்படையில் அந்த நாட்டில் ஆட்சி மாற்றம் கொண்டு வரப்பட்டது. எனவே அந்த நாட்டு அரசியல் தலைவர்கள் கூடிய அனுபவம் கொண்டவர்கள்.
அவர்களைப் பொறுத்தவரை இலங்கை இனப்பிரச்சினை விவகாரத்தில் நேர்மையாகவும் விசுவாசமாகவும் நடந்து கொள்ள முனைகிறார்கள். இலங்கையின் இனப்பிரச்சினைக்கு நிரந்தர தீர்வு காண வேண்டுமென்ற நல்நோக்கத்துடன் எங்களை அழைத்துள்ளனர்.
இலங்கையரசாங்கத்தின் குழுவினர் தென்னாபிரிக்காவுக்குச் சென்று வந்துள்ள னர். நாங்கள் அவர்களால் அழைக்கப்படுகின் றோம். அங்கு செல்வதன் மூலம் இலங்கை யரசின் நிலையை அறிய வாய்ப்பு எமக்குண்டு.
கடந்த இரண்டு வருடங்களாக தமிழ்த்தேசியக் கூட்டமைப்பு இலங்கை அரசாங்கத்துடன் விசுவாசமாக பேசி வந்துள்ளது. அரசியல் தீர்வு காண நல்லிணக்கத்தை ஏற்படுத்த கடும் முயற்சி மேற்கொண்டு வந்துள்ளோம் எமது முயற்சி கைகூடவில்லை நாம் எதிர்பார்த்தது நடக்கவில்லை. இலங்கையரசு இந்த முயற்சியில் எந்தளவுக்கு விசுவாசமாகஇ நேர்மையாக நடந்து கொள்கிறது என்பது பற்றி கூட்டமைப்பினராகிய எங்களுக்கு பொதுவாக தமிழ் மக்களுக்கு சந்தேகங்கள் உண்டு. இருந்த போதிலும் தென்னாபிரிக்காவின் முயற்சியை நாங்கள் வரவேற்கின்றோம். அவர்கள் நல்நோக்கத்துடன் இந்த முயற்சியில் இறங்கியுள்ளனர்.
இருந்த போதிலும் நாங்கள் இலங்கை அரசைப் பொறுத்தவரை அவதானமாக இருக்க வேண்டும். இலங்கை அரசாங்கமானது தென்னாபிரிக்காவின் நல் முயற்சியை தங்களுக்கு சாதகமாக பயன்படுத்தி விடுவார்கள் எனப் பயப்படுகின்றோம். நாங்கள் விசுவாசமாக தீர்வு காண முயலு கின்றோம் என்ற நிலைப்பாட்டை உருவாக்கக்கூடிய வகையில் அவர்கள் நடந்து கொள்ள வேண்டும். தென்னாபிரிக்காவின் முயற்சியும் அமைய வேண்டும். இதுபற்றி தென்னாபிரிக்க அரசுக்கு நாங்கள் தெளிவாக எடுத்துக் கூறியிருக்கின்றோம். அவர்களும் அதை அறிவார்கள். இந்த நம்பிக்கையின் அடிப்படையில் தென்னாபிரிக்காவுக்கு எனது தலைமையில் அடுத்த வாரம் செல்ல இருக்கின்றோம்.
எமது பயணம் உடனடியாக ஒரு நல்ல முடிவைத் தேடித்தருமென்றோ சாதகமாக அமையுமென்றோ சொல்ல முடியாவிட்டா லும் தாமதமில்லாமல் ஏதாவது நன்மை நடைபெறக்கூடிய சாதக நிலை காணப்படுமானால் அதை நடைமுறைப்படுத்த எம் மால் இயன்ற முயற்சிகளை எடுப்போம்.
இந்திய அரசின் இன்றைய நிலைப்பாடு எவ்வாறு இருக்கின்றது என அவரிடம் வினவிய போது
நாங்கள் இந்தியாவின் நிலை பற்றி அதி கம் பேசக்கூடாது. அண்மையில் நாம் இந்தியா சென்றிருந்த போது இந்தியப் பிரதமர் ஏனைய அமைச்சர்கள் அரசியல் தலைவர் கள் ஆகியோரைச் சந்தித்திருக்கின்றோம். அவர்களிடம் நாங்கள் கூற வேண்டிய விடயங்களையும் அவர்களிடம் கூறியுள்ளோம். கடந்த வருடம் மார்ச் மாதம் ஜெனீவாவில் நடைபெற்ற மனித உரிமைப்பேரவைக் கூட்டத்தில் பல பேர் எதிர்பார்த்ததற்கு மாறாக சாதகமாக வாக்களித்தார்கள் இது எதிர்பாராத மாற்றமாக இருந்தது.
இலங்கை இனப்பிரச்சினை விவகாரத்தை தீர்த்து வைப்பதற்கு மேலும் அக்கறையாக செயல்பட முயல வேண்டுமென்று நம்புகின்றோம். நாங்கள் இந்தியாவிடம் கேட்டிருக்கின்றோம். சொல்லியிருக்கிறோம். அந்த முயற்சி தொடர வேண்டும்.
இந்தியாவை விமர்சிப்பதால் எதையும் அடையலாமென்று நான் நினைக்கவில்லை. எமது பிரச்சினைக்கு தீர்வு காண இந்தியா ஒரு காலகட்டத்தில் தன்னால் இயன்ற அதிக முயற்சிகளை மேற்கொண்டுள்ளது. ஆனால் அது கைகூடவில்லை. அது கைகூடாமல் போனதற்கு ஒரு வகையில் நாங்களும் பொறுப்பானவர்கள் என்பதை ஏற்றுக்கொள்ள வேண்டும்.
இது பற்றிச் சிந்திக்கிறவர்கள் இந்த உண்மையை மறுக்க முடியாது. எனவே எமது கருமங்களை கவனமாக கையாள வேண்டும் பகிரங்கமாக இந்தியாவை பேசுவதன் மூலம் விமர்சிப்பதன் மூலம் அந்த நாட்டை எமக்கு சாதகமாக செயற்பட வைக்க முடியாது.
எமது கருத்தை இந்தியாவுக்கு சொல்ல வேண்டிய நேரத்தில் சொல்ல வேண்டிய முறையில் சொல்லியுள்ளோம். அவ்வாறு சொல்வதன் மூலமே எமது நோக்கை நிலையை நிறைவேற்ற முடியும்.
இலங்கை விவகாரம் தொடர்பாக ஜெனீவா மனித உரிமைப்பேரவையினால் ஆராயப்பட்டு வருகின்றது. மனித உரிமைப் பேரவையினர் இலங்கைக்கு வருகை தந்து பலரைச் சந்தித்து கலந்துரையாடியுள்ளனர் எம்மையும் சந்தித்துப் பேசினார்கள். ஜெனீவாவின் உயர் அதிகாரிகள் மற்றும் பல்வேறு நாடுகளைச் சேர்ந்த தூதுவர்கள் ஐ.நா.சபை அதிகாரிகள் இலங்கைக்கு வருகை தந்து விசாரணைகளை நடத்திச் சென்றுள்ளனர். எல்லோரையும் நாம் சந்தி த்து உரையாடியுள்ளோம். ஜெனீவாவின் மனித உரிமைப் பேர வைக் கூட்டம் எதிர்வரும் மார்ச்சில் நடைபெறவுள்ளது. அக்கூட்டம் நடை பெறுவதற்கு முன்பாகவும் இன்னும் பலர் வரவிருக்கின்றார்கள்.
இவ்வாரமும் பலர் இலங்கைக்கு வரவிரு க்கின்றார்கள். அவர்கள் உண்மையை அறிந்து நியாயத்தின் அடிப்படையில் நடந்து கொள்வார்கள் என்று நம்புகின்றோம் என சம்பந்தன் தெரிவித்தார்.
-->
0 கருத்துகள்:
கருத்துரையிடுக
‘பின்னூட்டமிட்டு செல்லுங்கள்’