கொழும்பில் இன்று இடம்பெற்ற துப்பாக்கிச் சூட்டில் ஒருவர் பலி; மற்றையவர் காயம்

கொழும்பின் சனசந்தடிமிக்க மிக்க பொரளைப் பகுதியில் பலரின் கண் முன்னே இன்று மாலை இடம்பெற்ற துப்பாக்கிச் சூட்டுச் சம்பவத்தில் ஒருவர் சம்பவ இடத்திலேயே உயிரிழந்துள்ளார். மற்றையவர் காயமடைந்துள்ளார். காயமடைந்தவர் உடனடியாக மருத்துவமனைக்கு எடுத்துச் செல்லப்பட்டுள்ளார்.

குறித்த நபர்கள் இருவரும் வான் வண்டியொன்றில் பயணித்துக் கொண்டிருக்கையில் துப்பாக்கிச் சூட்டுக்கு இலக்காகியுள்ளதாக ஆரம்ப கட்ட விசாரணைகளில் இருந்து தெரிய வந்துள்ளது. துப்பாக்கிச் சூட்டை நடாத்திய மர்ம நபர்கள் தப்பியோடியுள்ளனர். இச்சம்பவம் குறித்து பொரளைப் பொலிசார் விசாரணைகளை முன்னெடுத்துள்ளனர்.
ஜனாதிபதியின் இரண்டாம் பதவிப் பிரமாண கொண்டாட்டங்களை முன்னிட்டு பத்தடிக்கு ஒரு இராணுவத்தினர் வீதம் ஆயுதங்களுடன் கொழும்பில் நிலைகொள்ள வைக்கப்பட்டுள்ள நிலையில் நடந்தேறியுள்ள துப்பாக்கிச் சூட்டுச் சம்பவம் பெரும் அதிர்ச்சியை ஏற்படுத்தியுள்ளதாக அங்குள்ள மக்கள் தெரிவித்துள்ளனர்