அட்டனில் கடத்தப்பட்ட மாணவிகள் கம்பளையில் மீட்கப்பட்டனர்

இனந்தெரியாத குழுவொன்றினால் கடத்தப்பட்டதன் பின்பு விடுவிக்கப்பட்டுள்ள ஹட்டன் ஹைலண்ஸ் கல்லூரியைச்சேர்ந்த இரண்டு மாணவிகள் உடலில் ஏற்பட்டுள்ள காயங்களுடன் கம்பளை வைத்தியசாலையில் அனுமதிக்கப்பட்ட நிலையில் சிகிச்சைப்பெற்று வருகின்றனர்.

கடந்த 2 ஆம் திகதி அட்டன் நகரில் வேன் ஒன்றில் கடத்தப்பட்ட இந்த இரண்டு மாணவிகளும் அன்றைய தினம் இரவு 7 மணியளவில் கம்பளை சிங்கஹபிட்டிய பகுதியிலுள்ள காட்டுப்பகுதியில் கைவிடப்பட்டதாகவும் இவர்களைக் கண்ட பிரதேச வாசி ஒருவர் 119 அவசர பொலிஸ் பிரிவுக்கு அறிவித்ததைத்தொடர்ந்து கம்பளை பொலிஸார் இவர்களை மீட்டு விசாரணைக்கு உட்படுத்தியதோடு கம்பளை வைத்தியசாலையிலும் அனுமதித்துள்ளனர்.

இவர்களை பரிசோதனைக்கு உட்படுத்திய கம்பளை வைத்தியசாலையின் சட்டவைத்திய அதிகாரி முஹித்த அப்பு ஆராய்ச்சி இந்த மாணவிகளின் உடல்களில் சிறு சிறு காயங்கள் உள்ளதாகவும் தெரிவித்துள்ளார். இந்த நிலையில் அட்டன் ஹைலண்ஸ் கல்லூரியில் தரம் 10 இல் கல்விக்கற்கின்ற இந்த மாணவிகள் இருவரும் எபோட்ஸிலி மற்றும் கொட்டகலையைச் சேர்ந்தவர்களாவர்.

இவர்கள் இருவரும் கடந்த 30 ஆம் திகதி பாடசாலைக்கு வந்துள்ளனர். எனினும் இவர்கள் 2 ஆம் திகதி பாடசாலைக்குச்சமுகந்தரவில்லை .இந்த மாணவிகள் வீடு திரும்பாதது குறித்து அவர்களின் பெற்றோர்களால் பாடசாலைக்கும் அட்டன் பொலிஸாருக்கும் 2 ஆம் திகதி மாலை வரை அறிவிக்கப்படவில்லை எனத்தெரிவிக்கப்படுகின்றது. இந்தச்சம்பவம் தொடர்பில் கடத்தப்பட்டதாக கருதப்படுகின்ற இரண்டு மாணவிகளும் பொலிஸாருக்குப் பின்வருமாறு தகவல் தெரிவித்துள்ளனர்.

கடந்த 2 ஆம் திகதி காலை வேளையில் பாடசாலைக்கு அட்டன் நகரூடாக வந்து கொண்டிருந்த போது அவர்களிடத்தில் நெருங்கி வந்த வயோதிப பெண்ணொருவர் எதோ முகவரி ஒன்றினைக் கேட்டுள்ளார்.அதன் போது திடீரென அந்த வயோதிப மாது மயக்கமுற்றது போல கீழே விழ எத்தனித்துள்ளார்.இதன் போது அந்த வயோதிபப் பெண்ணை இந்த மாணவிகள் கைகளால் தாங்கி கொண்டிருந்த போது அவ்விடத்தில் திடீரென வேன் ஒன்று வந்துள்ளது. வேனில் உள்ளே இருந்தவர்கள் உடனடியாக அந்த வயோதிபப் பெண்ணை வேனினுள் ஏற்றுமாறு கூறியுள்ளனர்.

அப்போது வேனுக்குள் அந்தப்பெண்ணை ஏற்றும் போது குறிப்பிட்ட மாணவிகளை வேனில் இருந்தவர்கள் உள்ளே இழுத்து மூக்குக்கருகில் திரவமொன்றினை நுகரச்செய்ததாகவும் அதன் பிறகு தாம் மயக்கமுற்றதாகவும் மயக்கம் தெளிந்த போது புரியாத இடமொன்றில் தாம் இருந்ததாகவும் அவர்கள் தெரிவித்துள்ளனர். இந்தக்கடத்தல் சம்பவம் தொடர்பாக கம்பளை மற்றும் அட்டன் பொலிஸார் விசாரணைகளில் ஈடுபட்டு வருகின்றனர்