தமது வருமானத்தை ஒரே நோக்காகக் கொண்ட கடத்தல்காரர்களிடம் சிக்கி உயிரிழக்க வேண்டாம். இலங்கையரிடம் அவுஸ்திரேலிய பிரதமர் கோரிக்கை

வருமானத்தை மட்டும் ஒரேயோரு நோக்காக கொண்டு செயற்படும் கடத்தல்காரர்களிடம் சிக்கி உயிர் அச்சுறுத்தலை ஏற்படுத்திக்கொள்ள வேண்டாம் என அவுஸ்திரேலிய பிரதமர் ஜுலியா கிளார்ட் அறிவுறுத்தியுள்ளார்

. அகதிகளை கடத்துபவர்களின் பிரதான நோக்கம் நிதிசேகரிப்பதே அன்றி மக்கள் நலன் அல்லவென அவுஸ்திரேலியாவில் உள்ள இலங்கை அகதிகளிடம் அவுஸ்திரேலிய பிரதமர் வேண்டுகோள் விடுத்துள்ளார். இலங்கைக்கான அவுஸ்திரேலிய உயர்ஸ்தானிகரகத்தின் அறிக்கையின்படி அந்த நாட்டு அரசாங்கம் அகதிகள் பிரச்சினைகள் தொடர்பில் கடந்த வாரம் விரிவாக ஆராய்ந்துள்ளது. இந்த ஆய்வுகளின் படி அவுஸ்திரேலியாவிற்குள் வந்துள்ள சட்டவிரோத இலங்கை குடியேற்றவாசிகள் சர்வதேச அகதிகள் சட்டத்திற்கு கீழ் வரவில்லை என தெரிவிக்கப்பட்டுள்ளது.

எனவே அவர்களுக்கு அவுஸ்திரேலியாவில் குடியுரிமை வழங்குவதில் நெருக்கடி காணப்படுவதாக பிரதமர் ஜுலியா கிளார்ட் தெரிவித்துள்ளார். இதன்படி பெரும்பாலான இலங்கை அகதிகளுக்கு மீண்டும் நாடு திரும்பவேண்டிய நிலையேற்படும் என தெரிவிக்கப்பட்டுள்ளது. இலங்கையில் தற்போது பாதுகாப்பு நிலை வழமைக்கு திரும்பியுள்ள நிலையில் தொடர்ந்தும் அவர்களுக்கு சுயாதீன அகதிகள் அந்தஸ்தை வழங்கமுடியாதென ஐக்கிய நாடுகள் அகதிகள் ஆணைக்குழு தீர்மானித்துள்ளது. எனவே அகதிகள் ஒவ்வொருவர் தொடர்பிலும் தனித்தனியாக கவனம் செலுத்தப்படவுள்ளதாக அவுஸ்திரேலிய அரசாங்கம் தெரிவித்துள்ளது.