யாழ் மாநகர சபைக்குரிய பகுதிகளில் பொதுமக்களுக்கு இடையூறுகளையும் சிரமங்களையும் ஏற்படுத்தும் அனைத்துத் தடைகளையும் அகற்றி இப்பகுதிகளை குப்பைகளற்ற சுத்தமான பகுதிகளாக மாற்றும் தனது திட்டத்தை ஈழ மக்கள் ஜனநாயகக் கட்சியின் செயலாளர் நாயகமும் சமூக சேவைகள் மற்றும் சமூக நலத்துறை அமைச்சருமான டக்ளஸ் தேவானந்தா அவர்கள் தீவிரமாக்கியுள்ளார்.இதன் பிரகாரம் இன்றைய தினம் (10) அதிகாலை யாழ் நகரப் பகுதி மற்றும் குருநகர் பாசையூர் நாவாந்துறை போன்ற பகுதிகளுக்கும் திடீர் விஜயம் மேற்கொண்டிருந்த அமைச்சர் அவர்கள் பொதுமக்களின் பாவனைக்கு உட்படும் பகுதிகளில் அம்மக்களின் சுதந்திரமான நடமாட்டங்களுக்கு இடையூறு மற்றும் சிரமங்களை ஏற்படுத்தும் விடயங்களைத் தவிர்ப்பது மற்றும் குப்பைகளை குவிக்காமல் தடுப்பது குறித்தும் அப்பகுதி வர்த்தகர்கள் உட்பட பொதுமக்களுக்கு ஆலோசனை வழங்கியிருந்தார்.
இதன் தொடர்ச்சியாக இன்று மாலை யாழ் மாநகர சபைக்கு விஜயம் செய்த அமைச்சர் டக்ளஸ் தேவானந்தா அவர்கள், யாழ் மாநகர சபை முதல்வர் ஆணையாளர் மற்றும் துறைசார் அதிகாரிகளுடன் மேற்படி விடயம் தொடர்பில் கலந்துரையாடியதுடன் இவர்களுடன் மீண்டும் யாழ் நகரப் பகுதிக்கு விஜயம் செய்து குப்பைகள் கொட்டும் இடங்களை ஆராய்ந்து அவற்றை உடனுக்குடன் அகற்றுவதற்கான பணிப்புரைகளை வழங்கியதுடன் கடைத்தெருக்கள் முழுதும் சென்று குப்பைகளை நடை பாதைகளில் கொட்டுவதை இன்று முதல் தவிர்த்துக் கொள்ளும்படி ஆலோசனை தெரிவித்ததுடன், இதனை மீறி குப்பைகளை பொதுமக்களின் பாவனைக்கு உட்படும் நடைபாதைகளிலும் ஏனைய இடங்களிலும் கொட்டுவோர் அதனை அகற்றும் பொறுப்பையும் ஏற்றுக் கொள்ள வேண்டும் என்பதையும் சுட்டிக் காட்டினார்.
அத்துடன் பொதுமக்களின் சுதந்திரமான நடமாட்டத்திற்கு பெரிதும் பாதிப்புக்களை ஏற்படுத்தி வருகின்ற சட்ட விரோதமான நடைபாதை கடைகளை அகற்றுவதற்கும் அமைச்சர் டக்ளஸ் தேவானந்தா அவர்கள் பணிப்புரை வழங்கியுள்ளார்.
மாநகர சபையின் அனுமதியின்றி இவ்வாறான பல கடைகள் யாழ் நகரப் பகுதிகளில் பொதுமக்களின் சுதந்திர நடமாட்டத்திற்கு தடையாக இருந்து வருவது குறிப்பிடத்தக்கதாகும்.
0 கருத்துகள்:
கருத்துரையிடுக
‘பின்னூட்டமிட்டு செல்லுங்கள்’