ஆந்திராவில் பாம்பு வளர்க்கும் பட்டதாரி பெண்

பட்டதாரிப் பெண் ஒருவர் பாம்புகளைப் பராமரித்து, வளர்த்து வருகின்றார்.
இந்தியாவின் ஆந்திர மாநிலம் நிஜமா பாத் மாவட்டம் காமா ரெட்டி பகுதியைச் சேர்ந்த எம்.பி.ஏ. பட்டதாரியான சுவேதா என்பவரே இவ்வாறு பாம்புகளை வளர்த்து வருகின்றார்.

தற்போது ஐதராபாத்தில் வசித்து வரும் இவர், கடந்த சில ஆண்டுகளுக்கு முன்பு பெரிய நிறுவனம் ஒன்றில் வேலை பார்த்து வந்தார். அந்த வேலையை ராஜினாமா செய்துவிட்டுத் தற்போது பாம்புகள் நல அமைப்பில் சேர்ந்துள்ளார்.
தினமும் இவர் காயம் பட்டு உயிருக்குப் போராடும் பாம்புகளைப் பிடித்து வந்து சிகிச்சை அளிக்கிறார். மலைப்பாம்புகளுக்குத் தீனி போட்டு வளர்க்கிறார். அவற்றைத் தனது கழுத்தில் மாலையாகப் போட்டுக் கொஞ்சுகிறார்.
இதுபற்றி சுவேதா கூறும்போது,
"எனக்கு சிறுவயதில் இருந்தே பாம்பு என்றால் மிகவும் பிடிக்கும். அடிக்கடி பாம்புப் பண்ணைகளுக்குச் சென்று அவற்றை மணிக்கணக்கில் பார்த்து ரசிப்பேன்.
பாம்புகள் மீதுள்ள பாசத்தால்தான் நான் எனது வேலையை உதறிவிட்டு பாம்புகள் நல அமைப்பில் சேர்ந்தேன். நம் நாட்டில் அதிகமானோர் பாம்பைக் கண்டாலே கல் எடுத்து எறிகிறார்கள். சிலர் அடித்தே கொன்று விடுகிறார்கள்.
பாம்புகள் பகையை மனதில் வைத்துத் தீண்டிவிடும் என்றும் சிலர் கதை கட்டி விடுகிறார்கள். இதை யாரும் நம்ப வேண்டாம். பாம்பு யாரையும் எளிதில் கடிக்காது. அதை மிதித்தாலோ, தாக்கினாலோதான் அது கடிக்கும்" என்கிறார்.
நாள் முழுவதும் பாம்புகளுடன் வாழ்ந்து கொண்டிருக்கும் சுவேதா, இதுவரை 100-க்கும் மேற்பட்ட பாம்புகளுக்கு சிகிச்சை அளித்துக் காட்டில் விட்டுள்ளார். இவரது தாயார் ரயில்வே ஊழியர், தந்தை ஓய்வு பெற்ற வங்கி அதிகாரி.
சுவேதா பாம்பை உயிருக்கு உயிராக நேசிப்பதால், அவரது பெருமையான சேவைக்கு பெற்றோர்களால் தடை விதிக்க முடியவில்லை. எனவே முடிந்த அளவு தம் மகளுக்கு இவர்கள் ஊக்கமளித்து வருகிறார்கள்