மீள்குடியேறிய மக்கள் உணவின்றி வாடும் நிலை

நலன்புரி நிலையங்களில் தங்கியிருந்த மடு உதவி அரசாங்க அதிபர் பிரிவுக்குட்பட்ட பெரிய பண்டிவிரிச்சான் கிராமத்தின் 110 குடும்பங்களைச் சேந்த 257 பேர் நேற்று மீள்குடியேற்றம் செய்யப்படுவதற்காக அழைத்து வரப்பட்டுள்ளனர்.



பெரிய பண்டிவிரிச்சான் ம.வி. பாடசாலையில் தங்க வைக்கப்பட்டுள்ள இவர்கள், அழைத்து வரப்பட்ட நாள் முதல் இதுவரை உணவின்றி இருப்பதாகவும், குழந்தைகளுக்குக் கூட பாலுணவு எதுவும் வழங்கப்படவில்லை எனவும் தெரிவிக்கப்படுகின்றது.
பெரிய பண்டிவிரிச்சான் கிழக்கு கிராமத்தின் 48 குடும்பங்களைச் சேர்ந்த 138 பேரும், மேற்குக் கிராமத்தின் 62 குடும்பங்களைச் சேர்ந்த 119 பேரும் இவ்வாறு அழைத்து வரப்பட்டுள்ளனர்.
மேற்படி பாடசாலையிலிருந்து தமது சொந்தக் கிராமங்களுக்குச் செல்லுமாறும் இவர்களுக்கு அறிவிக்கப்பட்டுள்ளது. எனினும் எவ்விதமான அடிப்படை வசதிகள் மற்றும் துப்புரவு செய்யப்படாத வீடுகளில், குழந்தைகளுடன் எவ்வாறு மீள்குடியேற முடியும் என அவர்கள் கேள்வி எழுப்புகின்றனர்.
பாடசலையில் கொண்டு வந்து இறக்கி விடப்பட்டு பல மணி நேரமாகியும் எந்த அதிகாரியும் தங்களை வந்து பார்க்கவில்லை எனவும் அவர்கள் கவலை தெரிவிக்கின்றனர்.